فقير الحب

لافي الظفيري



اعتبرني حلم عابـر في حياتك

اعتبر حبي سحــابة في سماك

اعتبرني من بقايــا ذكرياتك

اعتبرني شخص مـا يرغب لقاك

ابتعد واجمع مع غيري شتاتك

يوم صــار الغير هو غاية هواك

التسلي بالمشاعر من صفاتك

يـــا فقير الحب اتبع من غواك

روح دور يا عديم الذات ذاتك

بارخص الاسعار يخسر من شراك

يا ردي الطبع بانت لي رداتك

يـــا عسى ربي عن العالم خذاك

باحيي الافراح في ليلة وفاتك

دام مــات الحب واحلامي معاك

تعــاتبني

طلال السعيد



تعاتبني بنظرات خفيــة

وأجاملها ولا ادري وش وراها

أجاوبهـا بنظرات حزينة

تعبر عن ضنـا الروح وشقاها

أسايرها وأجاوب كل نظرة

وأخبي الوجد وأبحث عن رضاها

وعقب ما شفتها عرفت قلبي

تناســاها ولكن ما نساهــا

غلاها يزود مع زود الليالي

وباع الناس قلبي واشتراهــا

وصرت أغار أنا منها عليها

خطا نفسي وآنا أتحمل خطاها

وأغار من أمها حتى وأبوها

وأغار من الذي بأمره ولاهـا

وأحسد اللي تبره بالرعايـة

وأحسد اللي بأحاسيسه رعاها

وأحسد البنـز لا قامت تسوقه

أخاف أنه يشاركني غلاهـا

وأحسد الريح لا حرك شعرها

وأحسد عيون غيري لا تراها

وأغار من القمر لا شع نوره

خذت نور القمر واصبح ضواها

وأحسد الشمس لا بانت عليها

أشعتهــــا تسبب في أذاها

وأحسد الأرض لا داست عليها

أثر خطواتها تحيي ثراهـــا

وأغار من النجوم إليا تعلت

وشافتها وعيني ما تراهـــا

وأغار من الهدوم اذا لبستها

عساهـا ما تجرحها عساهـا

واغار من الخواتم في يديها

وساعتهــا وكل اللي معاها

وأغار من القلادة في نحرها

وأغار من الشعر لامن كساها

وأغار من القصيدة لا قرتها

ولو هي قصتي واشكي جفاها

وتشمل غيرتي حتى المرايا

يحق لهــا بشوفتها تباهـا

نعم وأغار حتى من الوسادة

وأحسد فراشها ويا غطاهــا

آلا يا من يساعدني عليهـا

يوصلني هوى النفس ومناها

عجزت أعالج جروحي بروحي

جروح القلب ما تشفى بلاها

يا هاجر الأحباب

نوار عبد القادر



يــا هاجر الأحباب

يـــا خلي يا غدار

يـــا خاين وكذاب

وين الوفي وين صار

جرحي بعد مـا طاب

بيني وبينك ثـــار

لا تظن أنسى الأسى

مهمـــا تكن ناسي

في الهم صبح ومسى

شـيـبتلي راسـي

عسى أشـوفك عسى

تشرب مرار كاسي

لا بــد يجيلك يوم

تندم على مـا فات

وتصبح أنـا مظلوم

هيهات أحن هيهات

يقضي العمر محروم

وتعيش بالحسـرات

سافر عسى ربي

الأمير خالد الفيصل



سافر عسى ربي يحرسك وياقاك

هذا البخت عزاه وش في يديني

يا شين باكر يـــا حبيبي بلياك

لا جاء وعدك اللي بوقته تجيني

لي قمت أدوج في مداهيل ما طاك

يا مـا جرى بشهار بينك وبيني

هذا وهو توك تطري بممشــاك

وشلون لي قفيت يـا نور عيني

يا شيب عينك يا هوى البال واشقاك

كانك مثل ما أبيك يااسمر تبيني

قالوا تحبه

سعود بن بندر


قالوا تحبه قلت مــا هو بالحيل

بس انه أغلا شوي من نور عيني

يسوى جميع الجيل الأول وهالجيل

واحبابي المــــاضين والمقبلين

شوقي له أعظم من ظمى الأرض للسيل

واشفق عليــه أكثر من أم الجنيني

واحتاج له حاجة ثرى مصر للنيل

وعليه أغـــار أكثر من الوالدين

أشتــاق له شوق المحبين لليل

وارتــاح له راحت دموع الحزين

لا صار جنبي لو سنه وقتي بخيل

ولو غاب لو لحظة صارت سنيني

قـالوا يحبك قلت هذا هو الويل

مــا ودي أنشد ثم رفضه يجيني

واهدم رجاي بدبرتي مثل ما قيل

والأفضل أحيــا بالأمل لو لحيني

يــا حبكم يا ناس للقال والقيلي

الله يجازي . . جملة العــاذليني

خلوني أحيا في الوهم يالعواذيل

وش دخلكم والأمر بينــه وبيني

الليالي فرقتنا

خالد الفيصل



لا تقول إن الليالي فرقتنــا

لا تقول ظروفنا عيت علينـــا

الليالي يوم ودك جمعتنــا

يوم ودك كل شئ في يدينـــا

يا سقى الله ليلة بك عرفتنا

في شعيب شهار عن غيرك سلينا

من مغيب الشمس حتى طالعتنا

عن هل الدنيا نزعنا واعتلينــا

ليلة العشاق . . والله وردتنا

ما رد ذقناه لكن .. ما ارتوينا

ليتها .. يا ليتها .. ما ودعتنا

ليت ذاك الليل ما راح وسرينا

يوم هملنا الليالي هملتنـــا

كيف تعطينا وحنا ما عطينا ؟

الليالي عن هوانا ما نهتنــا

البلى حنا على البعد انتهينـا

كرهني بنفسك

سعود ين بندر



كأنك على قولك تمنى لي الخير

ساعدني أنسى حبك اللي خذاني

خلي حياتي تنقلب كلها غير

وانسى الحبايب والزمن والمكاني

حبي لك أبلغ من كل الأساطير

ما له بقاموس الهوى وصف ثاني

لا شك أنا أشعر بالنهاية وش تصير

واحسب حساب فراقنــا بالثواني

بيني وبينك واقع الحال تحذير

وعند الموادع مــا تفيد الأماني

عند خبر مثلي بحكم المقادير

على هوانــا صادر الحكم ثاني

كرهني بنفسك ولو بذنب صغير

القى به اعذاري واعود لزمـاني

المشكل انه ما بدى منك تقصير

وهذا يزود واقعك في كيـــاني

يــا عين

نورة الحوشان



يا عين هلي مــا في الدمع هليه

واذا انتهى صافيه هـاتي سريبه

يا عين شوفي زرع خلك وراعيه

شوفي معاويده وشوفي جليبــه

إن مر بي بالدرب ما أقدر أحاكيه

مصيبة يا وي والله مصيبـــة

واللي يبينــا عيت النفس تبغيه

واللي نبيه عجز البخت لا يجيبه

لا شـاريٍ عـقـد

بـدر بن عبد المحسن



لا شــاري عــقـدِ ولا مـهـدي سـوار

لا تلحـقي نفـسك همـوم وحـسـايف

تريثيي يـا قــرة الـعـين مــقــدار

ما تشرب عـروق القصيـد الوصـايف

لا من قـدحت الشـعـر وشـبـيـت لك نار

نارِ على روس الـهضـاب الـنـوايف

يطرب لهــا السـاري ويسـري بها الطار

وتزهر بهـا عـقب المحول الشـفايف

باهديك أنا عمر ولاكل الأعمار

يـفنى القلم قبــله وتفنى الصـحـايف

قـصيــدة تـولـد ورى بـاب وجــدار

ســر الضلوع المرهفــات النحـايف

وإلى أصـبحت طارت على متن الأسـفـار

وغنت بهـا قـبل النفــود الصـحايف

غـيبي وشـيـبي وإتركي كل مـا صـار

يبقى جـمـالك في قـصـيـدي طرايف

وخـلي الكواكب من سـنا نـورك تغــار

ولا تلـحقي نفـسك همـوم وحـسـايف

مـكانك .. مـكانك

طلال العبد العزيز الرشيد

الملتاع



أمـوت من فـرقـاك .. وأمـوت بلقـاك

وأمـوت من جورك ..وأمـوت بحنـانك

كلِ قـضــاه يمـوت مـرّه ويفــداك

وأنا أمــوت ألفين .مـرّه . عـشـانك

أذكــرك ..لامني نســيت إني أنسـاك

وأنســاك ..لامنّي ذكـرت انسـيــانك

رضـيت أنا بالهـم لرضـاك مـرضـاك

وارخصت لك قلبٍ جرحـتـه ..وصـانك

أجـيك في صدري عـتابِ ..وابجـفـاك

وأرجـع ألـوم الـوقت وأقـول خـانك

أحب فـيك ..احـسـاسي إني بلامــاك

في عـز خـوفي منـك احـس بأمـانك

عـجـزت أفـرق بين وصلك وفـرقـاك

ياللي عطـيت النـاس بيـدك عنـانـك

مــرً تجـيـني لين أقـول إنـي إيـاك

ومــر تروح .بـعـيـد وانـسي أوانك

أقـبل وتقـفي .. واعـتـذر عن خطاياك

وأقـول ما عـيـيـت ..عـيّـا. زمانك

وإن خــانتك دنيـاك .. أو خنت دنيـاك

إرجـع وتلـقـابي …مـكانك…مـكانك