بدر بن عبد المحسن وماذا بعد بدر بن عبد المحسن !

فكتوريا** · 08-11-2009

؛

التفت..
وتوها .. توها ما اختفت..
ماكساها الليل .. باللون الحزين
التفت .. وتعالت صرخته..
في نظرته..
صاح .. لكن بالنظر
وانكسر .. شوفه عثر !

حسايف .. تذبل الضحكه وهى بين الشفايف..

تذبل الفرحه وتضيع..

ويصبح الكون الوسيع..
مايكفي خطوتين .. لا كساه الليل باللون الحزين..
يوم مدلها يده
كانت الرجفه لقا..
ودعت فيها الشقا..
وتركت بين الاصابع
عطــرهــا..

وعمرها .. ما جت على وقت الوعد..

إلا ذاك اليوم ،،
و عمرها .. ما بكت و ما ضحكت..
ما حكت له .. واسكتت
مثل ذاك اليوم ،،
كانت أجمل من خياله .. كانت انضر..
كانت أكثر .. من أماني عمره الظامي حنين..
و اختفت ،، من كساها الليل باللون الحزين..

اختفت في الطريق اللي معه..

كانت تجيه..
كيف دربٍ جمعه معها .. خذاه..
ليتها اختارت سواه..
تزرع الفرقا لياليها .. عليه..
و حسايف .. حسايف ..

؛

فكتوريا** · 08-11-2009

ضمي مَلامح صورته ..
ضميه .. لعله يفيق ..
يَشهق .. أو يَردّ النَّفسْ ..
ضمّيه لعَله حبس ..
صٌوته .. رعشة عرٌوقه ..
وخيم حزين الصمت فُوقه ..
مات .. مات
من قبل ما يكتب له فـ قٌربك حياة ..
من لبسه ثوب البياض ..
من سبل عيٌونه ..
مسح غبرة جبينه ..
وش يفيد ..
اللي زرع نصلٍ حديد ..
في قلبه الطيّب نسى ..
قولي عسى .. ما تلمحي ..
فـ طرف ثُوبك له دما ..
يا خٌوفتي .. اللي سبح في نهرك الجَارف ..
غدا موته ظما ..
ضمّي ملامح صورته ..
ضمّيه لعله يفيق ..
يشهق أو يرد النفس ..
صوته جرس ..
ينحب على بوابة الليل ..
يوقظ خدر جرحك ..
يتل من عينك احبال الدّمع
ضمّيه لعله سمع ..
انك تحبينه ..
ولا ..قلتي تحبيه ..
ولا .. قلتي تحبيه ..

فكتوريا** · 08-14-2009

يسعد صباحك .. ليلنا تو ماجا
الشمس غابت ،، واشرقت عندكم شمس

هى شمسنا اللي في جبينك تلاجا
والا قمرنا اللي فقدناه من امس ؟

ليل السما برد وسحاب وعجاجا
يامن يشب النور في الخاطر العمس

انتى وانا .. لو كان منا نتناجا
لا ماطفت في خاطري شمعه الهمس

ياللى جرحتك مالجرحي علاجا
ادري الجروح النازفه .. تكره اللمس

بقول احبك .. وان عقدتى الحجاجا
لا قولها ثنتين و اربع مع خمس !

و يسعد صباحك يابعد كل ما جـا
وماراح من عمري.. وانا في رجا الشمس

.
.

فكتوريا** · 08-15-2009

*

تقول اللي طرف عينك أنا مدري هدب أو عود
أحس اني من اللي صابها ماشوف قدامي ..

ضحكت .. وقلت لاتخافي على بحر العيون السود
على شط الكحل مريت .. وهذا موضع أقدامي..

أدوّر عن ذهب عمري .. أدور كنزي المفقود
وأشوف الموج يطوي الموج ويبحر مركب أحلامي ..

عيوني بسمة اعيونك ولو صارت مطر ورعود
أبا اشرب من ظما دمعك وابااغسل جرحي الدامي..

عطيني عيونك الليلة .. وباكر ياعساه صدود
أمانه لا مسحتي الكحل خلي طيف أحلامي..

أحبك كان يكفي الحب جروحي في هواك شهود
أنا اللي راس مالي حلم .. وهم الدنيا قدامي..

*

فكتوريا** · 09-03-2009

لا تلوح للمسافر
المسافر راح
ولا تنادي المسافر
المسافر راح
يا ضياع أصواتنا
في المدى والريح..
القطار وفاتنا
والمسافر راح

يالله يا قلبي
تعبنا من الوقوف
ما بقى بالليل
نجمة ولا طيوف
ذبلت أنوار الشوارع
وإنطفى ضيّ الحروف
يالله يا قلبي سرينا
ضاقت الدنيا علينا..
القطار وفاتنا
والمسافر راح

مادري باكر هالمدينةوشتكون
النهار والورد الأصفر والغصون
هذا وجهك يالمسافر
لما كانت لي عيون
وينها عيوني حبيبي
سافرت مثلك حبيبي..
القطار وفاتنا
والمسافر راح

..

فكتوريا** · 09-05-2009

é

لو حبت النجمه نهر

وطاحت على صدرهـ سنا

إن مرت الغيمة قهر .. وإن هبت النسمة قهر

والى رمى طفلٍ حجر .. عكّر مواعيد الهوى

انتي وانا ( نجمه و نهر ) .. وطالت مشاوير السهر

بينك وبيني الغيم

الشمس

و أغصان الشجر

و حكي العواذل .. والحذر

و لو رمي طفلٍ حجر .. عكّر مواعيد الهوى

يابنت للنجمه سما .. وانا لي الوادي

ماختار في قربك ولا .. اختار في بعادي

امشي ,, و لاودي .. لو تمسكي يدي

لا اضيع فـ أمواج البحر .. ويفوت ميعادي

إن مرت الغيمه قهر .. و إن هبت النسمه قهر

لـو حبت النجمه نهر

~

ليتنى همك · 09-16-2009

على آخر تراب الأرض ...
أحس أن المسافة شبر ...
وكل الأرض ... ما تحمل تعب مشوار ...
أحس إني ... رغم صغري ... تفاهة عمر ...
في صدري ندم جبّار ...
يا ليت ... يا ليت ... ما كانت لي عيونك أرض
ولا عمري وقفت فـ يوم
على آخر تراب الأرض ...
تصّورتك ... وحزن الناس ...
جرح النّاس ... وهم النّاس ... في عيونك ..
تخوني النّاس وتخونك ...
تصّورتك في شامة ليل ...
على خَدِ السَّما الزرقا
زحَام والدنيَا سهرانه ...
أحَد نازل وَأحَد يرقى ...
وأحَد مِثلك يخاف من الَبلل والطين ...
يقول إن الرعد قاسي ...
يحس ان المطر سِّكين
يحسّ ان الذي يضحك ... يحس ان الذي يبكي ...
لا حَد مسكين ...
تصوّرتك ... ولا ادري ليه ...
ولا أظنك بَعد تدرين ...
يا انتي ان المسافه ِشبر ...
يا انتي إن الليالي َصبر ...
وكل الأرض ... ما تحمل تعب مشوار ...
على آخر تراب الأرض ...
على الميهاف ...
ومرتني الليالي خفاف
تَعدَّت عمري المعدود ...
دِريت ان الَمدى محدود ...
وان الليل لا شعرك ... ولا رمشك ...
ولا شفت الشفق في خدود ...
دريت اني عجزت املك ... ولو همّي ...
ونزيف الجرح ... من دمي ...
صحيح الدنيا ما تنشاف ...
وانا وانتي على الدنيا ...
وعلى الميهاف ...
أحس ان المسافة شبر ...
أحس إن الليالي ... صبر ...
وكل الأرض ... ما تحمل تعب مشوار ...
أحس إني رغم صغري ... وتفاهة عمر ...
في صدري ندم جبار ...
يا ليت ... ... يا ليت ... ما كانت لي عيونك أرض
ولا عمري وقفت فـ يوم
على آخر تراب الأرض ...

بدر بن عبدالمحسـن

نديم الصمت · 11-03-2009

يعطيك الف عافية بالفعل استمتعنا بالمشاركة تحياتي

nooof · منذ 2 أسابيع

الطير .. مر

ولا لمست باصبعي

جمر .. وفي بالي إحترق

ولا دخلت البحر .. واكفاني معي

ودي .. عن انفاسي .. افترق

لكن لمحت الموت ..

مرّه .. يمكن مرتين

ما كان هالقاسي الحزين

سمعت له صوت

انا مرني الموت مثل طير

ودعاني ..

وانا عجزت .. أطير

**************************

هذا انا ..

لا صرت مزحوم بذنوبي

أتذكر سالف دروبي

والأكيد اني انسرق

كل ما يمر الوقت

واللي يبي الوقت

غير اللي فـ جيوبي

إدعي معي ..وإلا أخشعي

وماهي ترى مرثيتي

لا تجزعي ..

ليتي شجاع لهالحد

وإلا صدوق إلى هالحد

البارحه والريح تحمل رملها

واللي عطتها الارض ذكرى

من بقايا أهلها

عطاني من بعض القبور.. تراب

ومن كل غايب ..

جلد وعظم و أسلاب

كانوا قراب إلى هالحد

وذكروني .. لو الذنوب .. تعد

وش كثر أنا شايب

الطير .. مر .. و .. مر

وما لمحناه .. ولا دعانا

وبيت قصرانا .. به .. بكا

ظنك ؟ أحد طار ؟

بدر بن عبد المحسن وماذا بعد بدر بن عبد المحسن !

منتدى الشعر

بدر بن عبد المحسن وماذا بعد بدر بن عبد المحسن !

منتدى الشعر